(x-metodo) Iri al Prezentopaĝo
La 16an de junio 2007 okazis la Esperanta aranĝo omaĝe al la 28a datreveno de la fondiĝo de Kuba Esperanto-Asocio, en la lokalo La fenestro de Luz Vázquez lokita en la ĝardenoj de la sidejo de UNEAC (Nacia Asocio de Verkistoj kaj Artistoj de Kubo). Partoprenis 30 invititoj, kaj la provinca filio Granma kaj la municipa Bayamo havis la ŝancon dividi la tempon kun Esperantistoj membrofondintoj, el kiuj kelkaj parolis pri okazaĵoj dum eventoj, kongresoj kaj renkontiĝoj. La prezidanto de la filio, Anyer Montero Ramos, parolis pri la apero de Esperanto en Granma kaj en la lando, pri la vivo de Zamenhof kaj pri D-ro Fernando Ortíz, grava apoganto de Esperanto en Kubo.
Frank Cedeño, sekretario de la provinca filio prikomentis la nunan momenton de la kuba Esperantista movado, kaj de la mondo, samkiel la utilecon de Esperanto en kino, radio, televido kaj muziko. Li substrekis la agadon de la movado en Granma kaj la kunlaboro de ĉiuj estraranoj.
La ĉeestantoj interŝanĝis opiniojn, donacojn, kaj ili proponis pli profunde informi pere de la popolaj konsilantaroj en la komunumoj.
Okaze de la datreveno ĉiuj tostis kaj en la fino, la prezidanto Rafael Cabrera Espinosa prikomentis trajtojn de la movado, invitis ĉiujn pli bone konatiĝi kun la movada historio kaj pli rekte rilatiĝi kun kubaj kaj eksterlandaj Esperantistoj, por garantii la pluekziston de Esperanto.
Raportis: Anyer Montero
Prezidanto de la municipa filio en Bayamo, Granma